رسالتي الى "حركة حماس" وللاسف بعد فوات الأوان...

 د. احمد هشام حلس 
.
وسأكتبها بلغتنا العامية, لغة المظلومين, لغة الشارع الغزاوي الحزين المفحر والمليان بالناس النايمين على الارض بأطفالهم ونسوانهم بدون غطا وبدون اكل وبدون مي, في البرد وتحت المطر وفوق اللاصة والوحل, بين العرس والفيران والكلاب والبسس, في الليل البارد مع ريحة الجثث والموت, بين جبال الحطام وركام البيوت المدمرة......
.
ما بعرف اذا ضايل الكم فرصة تنقذوا شعب غزة او لا, بعد كل هالموت وكل هالدمار, وقع الفاس في الراس, والخسائر اكبر من امكانية تخيلها, وسيبونا من الاوهام والخزعبلات الي بتروجوها وبتنشروها بين العالم برا حدود غزة, ارجوكم كونوا واقعيين ولو لمرة واحدة في تاريخكم كله, كونوا مع الحقيقة مرة وحدة بس, بدون اوهام, بدون تمنيات, بدون احلام وتطلعات وتوقعات وافتراضات ومراهنات مستقبلية, بدون فرضيات مستحيل تتحقق ومن وحي التجربة, وضمن المتاح والممكن, بتطلع كلها افتراضات من وحي خيالكم المفصول كليا عن الواقع, الناس انتكبت, الناس انطحنت, والسبب انتو, السبب خططكم ومشاريعكم, بدون لف ودوران, وبدون اتهامات او مناكفات, انا ما بحكي سياسة, اقسم بالله ما بحكي سياسة, ولا بدعم حدا ضدكم, الناس في غزة انسحقت بسبب هجومكم في سبعة اكتوبر, ولو هذا الطرح مش مزبوط, وانو الاحتلال الحقير ما بدو مبرر ولا بدو فرصة, تمام, ممتاز, كان تركتوه يعمل هيك بدون هجومكم, كان موقفنا افضل مليون مرة من الوضع الحالي, وكان عالميا برضو موقفنا افضل من الان بمليون مرة, وكان انتو كمان موقفكم قدام خصومكم السياسيين وشعبكم افضل مليار مرة,,,, الاحتلال استخدم هجومكم المنفرد والمتهور والمندفع وغير محسوب النتائج بطريقة حقيرة وقذرة على مستوى العالم كله, ومش راح احكي كتير في هيك موضوع. 
.
اليوم صار الي صار, وورطنا كلنا ورطة سودة, كلنا وانتو اولنا, والكل دفع ثمن مستحيل يتعوض, والوجع مستمر وبيزيد تعقيد مع الوقت, انا على يقين, وبعد تجربة 17 سنة من حكمكم, ومن تصدركم للمشهد الأمني والسياسي والاقتصادي والاجتماعي في غزة, انو انسحابكم من كل المشاهد وبالكامل حاليا يعتبر اقل ما يمكن تقديمه لأهل غزة, مارسوا العبقرية والذكاء ولو لمرة واحدة ارجوكم, اختفوا من المشهد, افعلوا ما فعله حزب الله في لبنان, تواروا عن الانظار, ولو لفترة من الزمن, اوهموا الجميع انكم غلبتم المصلحة العامة بهدف اعطاء الناس فرصة لالتقاط الانفاس, وتضميد الجراح, وانسحبتم خطوات الى الخلف, اتركوا القيادة لفريق آخر, فريق لديه الخبرة والقدرة والعلاقات الدولية المناسبة, سلموا كل الجمل بما حمل لمنظمة التحرير او للسلطة, ورطوهم بهذا الارث الثقيل جدا والمعقد, احكوا للرئيس أبو مازن تعال شيل يا ريس, حاولنا نعمل اشي وما زبط معانا, اختفيوا عن انظار العالم, الي عاملكم حجة لقهر الناس وابادتهم في غزة, بلكي اتغير الوضع, بلكي فتحت المعابر, بلكي بلشت مشاريع اعادة الاعمار بسرعة, بلكي الناس اخدت فرصة للتعافي بسرعة, وقدموا للشعب الي انطحن 17 سنة مكافأة بالوحدة الوطنية وتوحيد المؤسسات, خوزقوا نتنياهو بلم الشمل الفلسطيني, اقهروا اليمين المتطرف في دولة الكيان بالوحدة, العدو ما بتستفزه جباتكم واستعراضاتكم بالمختطفات في الساحة, ولا بنفرين لبستهم قمصان كحلي ووقفتهم في نص الخراب وخليتهم يحكوا للجزيرة الشرطة ووزارة الداخلية تسيطر على الوضع في غزة، لا تسيطر ولا بطيخ، شفناكم طول الحرب، اختفيتوا وانسحبتوا واحنا اكلنا زفت، واكلونا المجرمين واللصوص والمرتزقة، مافيات الازمات، هادي حركات قرعة بتفتح شهية الاحتلال لمزيد من القتل والدمار, وبيشتغل عليها دوليا ومحليا لتبرير استمرار الحرب, المشاهد الهادي فقط بتقهر ام الشهيد وام الجريح والي راح بيته بدون اي مكسب عام او خاص, الي بيقهر الاحتلال وحدتنا ولم شملنا, جربوا اشي مختلف, جربوا طريق جديد, بقاء الحال على ما هو عليه يعني استمرار المعاناة واستمرار القهر, واستخدامكم لنفس الادوات ونفس خطوات العمل وانتظاركم لنتائج مختلفة ضرب من الجنون والخيال..... بدنا حل حقيقي لهالورطة, لهالمصيبة, حل على ارض الواقع, ما بدنا شعارات, شبعنا هتافات واشعار وبطولات فردية, ما بدنا ترقيع سطحي واسعاف اولي, ما بدنا مأثورات ثورية ودعم نفسي وتحفيز ديني, بدنا حل جذري, الناس طلعت روحها, انتوا مش شايفين القهر الي في قلوب الناس؟ ما بتسمعوا صوتهم؟ ما بتحسوا بوجعهم؟... بتمنى توصلكم رسالتي, بتمنى تاخدوها على محمل الجد, وتدرسوها بكل صدق, بتمنى تستجيبوا لهذا النداء.....
وحسبنا الله ونعم الوكيل.... والله من وراء القصد....

الدكتور/ أحمد هشام حلس.